كلمات من القلب

إلى متى .. وانت بوفاك .. متفانـي

إلى متى .. صابر على فقد رجـواك
وتداري احزانك وموت .. المعانـي

ما قلت لك .. لا يدخل الشوق دنياك
يقضي على كل الصبر فـي ثوانـي

وشلون تغلي واحدٍ .. كـان يجفـاك
قلبـه بخيـل .. وبالمحبـة أنانـي

كم مرةٍ .. تزعل ولا دوّر .. رضـاك
وشلون تقبـل يـا خفوقـي هوانـي

وين الكرامه .. وين باسك ومبـداك
لا تلومني ما جاك يـا قلـب جانـي

ما نيب اغصبك .. لا تبكيك شكـواك
دامك تحبّـه .. مـا تفيـد الامانـي

عساه يشكي مـن غرامـه بذكـراك
وتشغل كيان .. اللي نـواك ونوانـي

وتشوف حبك .. صار واقع .. وهنّاك
احساس ما قد يا خفوقي .. عصاني

سعادته.. لا شاف الافـراح تنصـاك
وتا خذك .. لاشواق الغلا .. والتهاني